Un espazo creativo municipal (público, aberto e gratuíto) para a xuventude
onde ensaiar, formarse e
facer música en Pontevedra

O Local de Música é un equipamento sociocultural do Departamento de Xuventude do Concello de Pontevedra, creado para apoiar a creación musical de base, especialmente de artistas e grupos noveis. 

Este espazo está pensado para que a mocidade teña acceso a instalacións profesionais en condicións dignas e sen causar molestias á veciñanza. Conta cun edificio equipado con salas de ensaio e material musical de calidade. 

A súa actividade xira arredor dos servizos básicos que ofrece: ensaio, gravación de maquetas e sala de concertos. A partir destes servizos, créase un movemento dinámico de mozos e mozas cun interese común: a creación artística e musical. 

Co tempo, e cunha xestión baseada nun enfoque socioeducativo, o Local de Música evolucionou de ser só un espazo de ensaio a converterse nun referente na vida cultural comunitaria de Pontevedra. Hoxe en día, acolle non só ensaios, senón tamén cursos, concertos, exposicións e encontros de grupos e asociacións xuvenís.